Оваа година најголемиот и светски најпознат саем за кондиторски производи (ISM – International Sweets and Biscuits Fair) се одржа во Келн, Германија во периодот од од 02.02. – 05.02.2025 година.
ISM е најголема интернационална платформа наменета за снабдувачи и купувачи од кондиторската индустрија и како таква е одлична можност за најпознатите компании од секторот од голем број држави, почнувајќи од Германија и нејзините соседни земји, до Гана и Индонезија, преку Австралија и Костарика да се претстават со своите најпродавани производи и да ги споделат искуствата за барањата на купувачите кои секогаш се во фокус при развојот на иновативни нови проозводи.
Повеќе од 1.500 изложувачи од 70 земји ги презентираа најновите трендови и иновативни производи, а околу 32.000 посетители од 135 земји го искористија саемот за да откријат нови деловни можности и да ги пробаат најновите трендови во производството.
АД Европа веќе 30 години учествува на овој саем на кој годинава се претставивме и со промотивен штанд на кој посетителите имаа можност да се запознаат со дел од нашиот широк асортиман на производи. Беше поделен рекламен материјал за производите кои ни беа во фокус оваа година, а најголемо внимание предизвикаа нашите најпродавани Крем Банана, Вафли и Бастуми.
Тимот кој ја претставуваше компанијата одржа голем број деловни состаноци со потенцијални купувачи и воспостави нови контакти со компании од Америка, Англија, Ирска, Шведска, Данска, Германија, Грција, Израел, Кувајт, Палестина, Либија, Канада, Коста Рика и Мексико.
ISM 2025 беше инспиративен, динамичен и насочен кон иновации и примена на нови технологии. Веќе се подготвува програмата за следната година која со сигурност ќе биде уште поинспиративна и посодржајна, зошто ISM секоја година нуди ново и незаборавно искуство.
